Ostiralean, urriak 9,CAFGUIALen egoitzan egin zen finken administrazioko profesionalei zuzendutako prestakuntza-jardunaldi berri bat, sektorearentzat interes berezia duten gaiak ardatz hartuta: eraikinen birgaitzea eta jabeen komunitateetan gatazkak kudeatzea eta konpontzea.
Jardunaldia Birgaitzeko Gida Auzotarraren aurkezpenarekin hasi zen, beren eraikinetan birgaitze-jarduerak egin nahi dituzten jabeen erkidegoei zuzendutako zerbitzua ezagutzera emanez. Saioan, Unai Sarasolak, Birgaitzeari Laguntzeko Bulegoko arduradunak, eta David Sánchez Bellidok, Euskal Herriko Arkitektoen Elkargo Ofizialeko (EHAEO) idazkariak, zerbitzu horren funtzionamenduaren berri eman zuten, eta komunitateei eta finken administrazioei laguntzeko eskaintzen dituen aukerak azaldu zituzten. Gainera, bertaratutakoek Birgaitze Gida bana jaso zuten.
Bigarren saioan finkak administratzeko bitartekaritzari eta jabeen komunitateetako gatazken kudeaketari heldu zitzaien, eta hori funtsezkoa da profesional horien eguneroko lanean. Prestakuntza Susana Barcena Izquierdo abokatu, bitartekari eta Deustuko Unibertsitateko Zuzenbide Fakultateko irakasleak eman zuen .
Txostenean hainbat alderdi jorratu ziren, hala nola auzo-inguruneetako eztabaiden identifikazioa eta diagnostikoa, komunikazio aurreratuko tresnak eta elkarrizketa-taldeen kudeaketa. Jabeen batzarretan bitartekaritza-tekniken aplikazioan ere sakondu zen, konponbideak bilatzea errazteko eta bizilagunen arteko harremanak hobetzeko.
Halako ekimenekin, CAFGUIALek finka-administratzaileen etengabeko prestakuntzarekiko konpromisoa berresten du, ezagutzak eguneratzea eta Gipuzkoako eta Arabako jabekideen erkidegoei ematen dieten zerbitzua hobetzen lagunduko duten baliabide praktikoetarako bidea erraztuz.
